आहा ! जुनार

कृषक पेडिया

आहा ! जुनार

मंगलबार, पुस १९, २०७९ एभरेष्ट पेडिया

काठमाडौं । रामेछाप जिल्ला जुनार खेतीका लागी प्रख्यात जिल्ला मानिन्छ । जुनार उत्पादनका लागि प्रख्यात रामेछाप नगरपालिकाको ओख्रेनी, गाईटार, सुकाजोर, रामपुर, हिमगंगा लगायतका भेगमा किसानका बगैँचा जुनारले पँहेलपुर बनेका छन् ।
रामेछाप नगरपालिका वडा नं. ६ ओख्रेनीका जुनार कृषक हिमालराज पाख्रिन आफ्नो बगैंचामा दैनिक दर्जनौं मानिसहरू बगैँचामा घुम्न आउने गरेको बताउँछन् ।
जुनारका बगैँचा घुम्न पुगेका आन्तरिक घुमन्ते तथा पर्यटकहरूले रामेछाप जुनारको जिल्लाको रुपमा ख्याति कमाएको जिल्ला भन्दै प्रशंसा गर्ने र यहाँको जुनार स्वादिलो रहेको प्रतिक्रिया दिने गरेको कृषक पाख्रिन बताउँछन्‌ ।

गत वर्षका तुलनमा यस वर्ष उत्पादन बढेको र विगतका वर्षहरूमा फलमा लाग्ने किराका कारण हैरानी भोगेका कृषक यस वर्ष किरा नलागेकाले उत्साहित भएको बताउँछन् ।

प्रधानमन्त्री कृषि आधुनिकीकरण परियोजना, परियोजना कार्यान्वयन इकाई रामेछापको जुनार जोनको सहयोगमा ९० प्रतिशतभन्दा बढी रोग नियन्त्रण भएको दाबी गरिएको छ । परियोजना कार्यान्वयन इकाई रामेछापका प्रमुख थिरलाल गैरेले नर्सरी उत्पादनदेखि उत्पादित जुनारको बजारीकरणसम्मको योजना बनाएर काम भइरहेको बताएका छन् ।

उनका अनुसार यसै वर्षदेखि रामेछापमा उत्पादित जुनारको ब्रान्डिङ, लेवलिङ र प्याकेजिङको काम सुरु हुँदैछ । यस वर्ष रामेछापमा मात्र करिब १५ हजार मेट्रिक टन जुनार उत्पादन हुने अपेक्षा गरिएको छ । यहाँ उत्पादित जुनार तराईका विभिन्न भाग तथा काठमाडौं उपत्यकामा बिक्री वितरण हुने गरेको छ ।