काठमाडौं। सरकारको राष्ट्रिय विपद् जोखिम न्यूनीकरण तथा व्यवस्थापन प्राधिकरणले काठमाडौं उपत्यका लगायत देशका प्रमुख सहरमा वायुप्रदूषण खतराको तह नजिक पुगेको भन्दै नागरिकलाई विशेष सतर्कता अपनाउन आग्रह गरेको छ।
गर्मी मौसमको वृद्धि, वन डढेलो तथा आगलागीका घटना, सडक तथा अन्य निर्माण कार्यबाट निस्कने धुलो, सवारी प्रदूषण, फोहर व्यवस्थापनमा कमजोरी, हिउँदे वर्षा कम हुनु र मनसुन सुरु नहुनुजस्ता कारणले हालैका दिनहरूमा वायु गुणस्तर सूचकाङ्क (AQI) निकै अस्वास्थ्यकर विन्दुमा पुगेको छ।
वायुप्रदूषणका कारण दम, श्वासप्रश्वाससम्बन्धी समस्या, सुख्खा खोकी, घाँटी चिलाउने, आँखा पोल्ने, छाला सुख्खा हुने, एलर्जी, टाउको दुख्ने र मानसिक थकान बढ्ने समस्या देखिन सक्ने विज्ञहरूले बताएका छन।
प्राधिकरणले वायुप्रदूषण न्यूनीकरणका लागि सकेसम्म घरमै बस्ने र घरबाटै कार्यालयका काम गर्न, सवारी साधनको प्रयोग कम गर्न, घर, सडक तथा सार्वजनिक स्थानको सरसफाइमा ध्यान दिन, अत्यधिक धुलो र धुवाँ उत्सर्जन गर्ने निर्माण कार्य केही समयका लागि स्थगन गर्न, फोहरमैलाको उचित व्यवस्थापन गर्दै जलाउने कार्य रोक्न, वन डढेलो रोकथाम तथा नियन्त्रणमा विशेष ध्यान दिने, घरबाहिर निस्कँदा सुरक्षित मास्कको प्रयोग अनिवार्य गर्न अनुरोध गरेको छ।
वायु प्रदूषण विज्ञहरूका अनुसार अझै एक हप्ता वायुप्रदूषणमा सुधार नहुने देखिएकोले प्राधिकरणले जिम्मेवार निकायहरूलाई तत्काल आवश्यक कदम चाल्न आग्रह गरेको छ।
-1740473541.jpeg)
