काठमाडौं। भैरहवास्थित गौतमबुद्ध अन्तर्राष्ट्रिय विमानस्थलमा एयरलाइन्स कम्पनीहरुले अन्तर्राष्ट्रिय उडान स्थगित गरेका छन्।
जाडोयाममा उडान गरिरहेका एयरलाइन्स कम्पनीहरुले ग्रीष्मकालीन मौसमका लागि उडान अनुमति नलिएको विमानस्थलका सूचना अधिकारी श्यामकिशोर साहले जानकारी दिए।
साहका अनुसार थाई एयर एसिया, जजिरा एयरवेज, फ्लाई दुबई र कतार एयरवेजले जाडोयाममा उडान गरेका थिए। फ्लाई दुबईले दुबई–भैरहवा–काठमाडौं दैनिक एक उडान गर्दै आएको थियो। जजिराले साताको तीन दिन कुवेत–भैरहवा उडान गर्दै आएको थियो। त्यस्तै थाई एयर एसियाले साताको एकपटक बैंकक–भैरहवा उडान गरेको थियो।
तर, जाडोयामको लिएको उडान अनुमति मार्च ३१ (चैत १८) गते सकिएको छ। त्यसमा पनि अधिकांश एयरलाइन्सहरुले उडान अनुमति सकिनुअगावै उडान स्थगित गरेका छन्।
उड्डयन क्षेत्रमा जाडोयाम र ग्रीष्मकालीन मौसम गरी ६–६ महिनाका दुईवटा उडान तालिका निर्धारण गर्ने गरिन्छ। सोहीअनुसार जाडोयामका लागि उडान अनुमति लिएका एयरलाइन्सहरुले ग्रीष्मकालीन मौसमका लागि उडान अनुमति माग गरेका छैनन्।
‘अहिले भैरहवाबाट अन्तर्राष्ट्रिय उडान भएका छैनन्’, सूचना अधिकारी साहले भने, ‘सबै एयरलाइन्सले जाडोयामको लागि लिएको अनुमति सकिएको छ। समरका लागि कुनैपनि कम्पनीहरुले उडान अनुमति माग गरेका छैनन्।’
नेपाल एयरलाइन्सले भने काठमाडौं–भैरहवा–क्वालालम्पुर उडान औपाचरिकरुपमा स्थगित नगरेपनि नियमित गर्न सकेको छैन। नेपाल एयरलाइन्सले काठमाडौं–भैरहवा–क्वालालम्पुर उडान गर्दै आएको थियो।
एयरलाइन्स कम्पनीहरुले तत्काल उडान अनुमति माग नगरेपनि आवश्यकताअनुसार आजको भोलि नै उडान अनुमति लिन सक्छन्। तर, उडान अनुमति सकिनु अगावै उडान बन्द गर्नु र अगामी उडानका लागि अनुमतिसमेत नमाग्नुले ‘एरलाइन्सहरु भैरहवाबाट दीर्घकालीन उडान गर्न सकारात्मक छैनन्’ भन्ने अनुमान गर्न सकिन्छ।
यद्यपि, जजिरा र थाई एयर एसियाले अप्रिलपछि उडान सुरु गर्ने आश्वासन दिएको साहले बताए।
बजारिकरणको अभाव
भैरहवाबाट नियमित उठान हुन नसक्नुको मुख्य कारण बजारिकणको अभाव भएको साह बताउँछन्।
‘एयरलाइन्सहरुको कुरा बुझ्दा यहाँको प्रमुख समस्या बजारिकरण हो’, साहले भने, ‘राज्य र राज्यका निकायहरुले भैरहवामा बजारिकरण गर्न सकेनन्, त्यही कारण यात्रु भएपनि उडान नियमित र व्यवस्थित हुन सकेन।’
सबै प्रशासनिक काम काठमाडौंबाट हुने हुँदा भैरहवाबाट यात्रा गर्न असुविधा भएको छ। जसकारण कुनै कुनै समय जजिराले काठमाडौंका यात्रुलाई बसमा भैरहवा पुर्याएर उडाउनसमेत परेको थियो।
गौतमबुद्ध विमानस्थलमा अन्तर्राष्ट्रिय उडानलाई नियमित गर्न राज्यका सबै निकाय र व्यवसायीहरुबीच समन्वयकारी भूमिका आवश्यक रहेको साह बताउँछन्।
त्रिभुवन विमानस्थल सञ्चालन अवधि लम्बियो
एयरलाइन्सहरुले भैरहवाबाट उडान स्थगित गरिरहँदा काठमाडौंस्थित त्रिभुवन अन्तर्राष्ट्रिय विमानस्थलको सञ्चालन अवधि लम्बिएको छ।
यसअघि रातको समयमा १० घण्टा उडान बन्द गरेर क्षमता अभिवृद्धि गरिएकोमा मंगलबारबाट सञ्चालन अवधि बढाइएको छ। अब त्रिभुवन अन्तर्राष्ट्रिय विमानस्थल दैनिक १८ घण्टा (बिहान ६ देखि राति १२ बजेसम्म) सञ्चालनमा रहने छ।
त्रिभुवन अन्तर्राष्ट्रिय विमानस्थलको सञ्चालन अवधि लम्बिँदा त्यसको असर पनि भैरहवालाई पर्ने अनुमान गरिएको छ। आगामी दिनमा अन्तर्राष्ट्रिय उडानहरु काठमाडौं केन्द्रित भएमा भैहरवामा अन्तर्राष्ट्रिय उडानको खडेरी लाग्नेछ।
-1740473541.jpeg)
