बर्लिन। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेलाई प्रतिष्ठित ‘टुरिज्म मिनिस्टर अफ द इयर – हिमालय क्षेत्र’ अवार्ड प्रदान गरिएको छ। यो अवार्ड प्रशान्त क्षेत्रीय ट्राभल राइटर्स एसोसिएसनद्वारा उत्कृष्ट शासन प्रणाली श्रेणी अन्तर्गत प्रदान गरिएको हो।
यो उच्चस्तरीय सम्मान जर्मनीको बर्लिनमा मार्च ४ देखि ६ सम्म आयोजना भएको इन्टरनेसनल टुरिज्मस बर्से मेलामा प्रदान गरिएको हो। आइटिबी बर्लिन विश्वकै अग्रणी पर्यटन व्यापार मेला मानिन्छ, जहाँ विभिन्न देशका पर्यटन व्यवसायी, नीति निर्माता तथा विज्ञहरू भेला हुन्छन्।
प्रशान्त क्षेत्रीय ट्राभल राइटर्स एसोसिएसनले इन्टरनेसनल ट्राभल अवार्ड प्रत्येक वर्ष पर्यटन प्रवर्द्धनमा महत्वपूर्ण योगदान पुर्याउने व्यक्ति, सरकार तथा संस्थाहरूलाई प्रदान गरिन्छ। यो अवार्ड विमानन, होटल, टुर अपरेटर, ट्राभल एजेन्सी, गन्तव्य प्रवर्द्धन तथा सरकारी निकायहरूमा उल्लेखनीय योगदान गर्नेहरूलाई दिइने गरिन्छ।
मन्त्री पाण्डेलाई पर्यटन क्षेत्रलाई दिगो विकासतर्फ लैजान तथा डिजिटल प्रविधिलाई समेट्दै अन्तर्राष्ट्रिय स्तरमा नेपाललाई अगाडि बढाउने नेतृत्व क्षमताका लागि सम्मान गरिएको हो।
यसै अवसरमा मन्त्री पाण्डे ‘प्रशान्त क्षेत्रीय ट्राभल राइटर्स एसोसिएसन वर्ल्ड टुरिज्म एन्ड एभिएसन लिडर्स समिट’को प्रमुख वक्तामध्ये एकका रूपमा पनि प्रस्तुत भए। ‘कृत्रिम बुद्धिमत्ता (एआई) र दिगो पर्यटन’ विषयक शिखर सम्मेलनमा उनले नेपालको पर्यटन नीति सुधारका लागि एआई-आधारित प्रविधि समावेश गर्ने योजनाबारे जानकारी गराए।
आइटिबी बर्लिन मेला पर्यटन उद्योगका विश्वव्यापी खेलाडीहरूलाई एकसाथ ल्याउने ठूलो अन्तर्राष्ट्रिय मञ्च हो। यस मेलामा १८० भन्दा बढी देशका १०,००० भन्दा बढी व्यवसायी तथा प्रतिनिधिहरू सहभागी हुन्छन्।
-1741145277.jpg)
-1740473541.jpeg)
