बोन गुम्बामा मनाइयो योङ्जिन रिम्पोछेको शताब्दीऔं जन्मोत्सव (भिडियाे)

एभरेष्ट पेडिया टिभी

गृहपृष्ठ
एभरेष्ट पेडिया टिभी
बोन गुम्बामा मनाइयो योङ्जिन रिम्पोछेको शताब्दीऔं जन्मोत्सव (भिडियाे)

बोन गुम्बामा मनाइयो योङ्जिन रिम्पोछेको शताब्दीऔं जन्मोत्सव (भिडियाे)

बिहीबार, माघ २४, २०८१ एभरेष्ट पेडिया

ट्रितेन नोबुर्चे गुम्बामा बोन धर्मका संस्थापक तोन्पा शेन्राव मिवोको मूर्ति र शताब्दीऔं जन्मोत्सव मनाइरहेका रिम्पोछेको तस्बिर

काठमाडौं। ‘युङ्डुङ् बोन्’ धर्मका धर्म गुरू योङ्जिन लोपोन तेन्जिङ नाम्दाक रिम्पोछेको शताब्दीऔं जन्मोत्सव धुमधामसँग मनाइएको छ। काठमाडौंको तीनघरेस्थित ‘ट्रितेन नोर्बुचे गुम्बा’मा बिहीबार बिहानैदेखि रिम्पोछेको सम्मानमा दीर्घायू पूजा, मण्डला अर्पण लगायतका विभिन्न धार्मिक कार्यक्रम भइरहेको छ।

जन्मोत्सवका अबसरमा रिम्पोछेबाट आशीर्बाद लिन स्वदेश तथा विदेशका भक्तजनको भिड लागेको छ। बोन धर्मका संस्थापक तोन्पा शेन्राव मिवोले मानव कल्याण र सुख शान्तिका लागि देखाएको बाटो अनुसरण गरेर रिम्पोछेले विश्वलाई उज्यालो मार्गमा हिँडाएका छन्। उनले बोन धर्मका विषयमा दुई दर्जन भन्दा बढी पुस्तक लेखेका छन्।

उनले सन् १९८६ सालमा काठमाडौंको तीनघरेमा ‘ट्रितेन नोर्बुचे गुम्बा’ स्थापना गरेका हुन्। यसलाई बोन धर्माबलम्बीको नेपालकै ठुलो गुम्बाको रुपमा स्थापित गराउने श्रेय पनि उनैलाई जान्छ। यहाँ बोन धर्म संस्कृतिको संरक्षण र साधना गरिन्छ। साथै गेशे (डाक्टर अफ फिलोसपी)सम्मको पढाई हुन्छ।

‘बोन धर्म संस्कृतिको संरक्षणमा पूजनीय रिम्पोछेज्यूको अतुलनीय योगदान छ’, गुम्बाका गेशे लोडोई छोगलेक भन्छन्, ‘उहाँको शताब्दीऔं जन्मोत्सव मनाउन पाउँदा हामी गौरवान्वित भएका छौं।’

रिम्पोछेको शताब्दीऔं जन्मोत्सवका अबसरमा गुम्बामा विभिन्न कार्यक्रम भइरहेका छन्। रिम्पोछेको दीर्घायू पूजा, नयाँ गुम्बा उद्घाटन, दीर्घायू प्रार्थना र मण्डला अर्पण कार्यक्रम भएको छ। यसैगरी शुक्रबार र शनिबार छैटौं अन्तर्राष्ट्रिय बोन सम्मेलन हुँदैछ भने माघ २७ देखि फागुन १ गतेसम्म गेशे उपाधी वितरण कार्यक्रम गरिनेछ।

bon-gumba-(16)-1738838969.jpg