काठमाडौं। सन् २०२४ मा संसारभरिका १ अर्ब ४० करोड मानिसले अन्तर्राष्ट्रिय यात्रा गरेका छन्।
संयुक्त राष्ट्रसंघको विश्व पर्यटन संगठन (यूएनडब्ल्यूटीओ)ले २०२४ मा १ अर्ब ४० करोड बढी मानिसले अन्तर्राष्ट्रिय यात्रा गरेको र विश्वको पर्यटन कोभिड– १९ महामारी अघिको अवस्थामा आएको जनाएको छ। कोभिड महामारीअघि सन २०१९मा पनि १ अर्ब ४० करोड बढी मानिसले अन्तर्राष्ट्रिय यात्रा गरेका थिए।
सो संख्यामा मानिसले अन्तर्राष्ट्रिय यात्रा गर्दा पर्यटन उद्योगमा १.९ ट्रिलियन डलर रकम खर्च भएको छ। जसको अर्थ प्रत्येक पर्यटकले औसतमा प्रतिव्यक्ति १,००० डलर भन्दा बढी खर्च गरेका छन्।
यूएनडब्ल्यूटीओ वार्षिक प्रतिवेदन अनुसार २०२४ मा पर्यटकको संख्या पुरानै अवस्थामा मात्रै फर्किएको छैन। केही देशहरुको वृद्धिदर उच्च बिन्दुमा पनि पुगेको छ।
२०२४ मा ७४ करोड ७० लाख पर्यटकका साथ युरोप सबैभन्दा भ्रमण गर्ने महादेश बनेको छ। त्यस्तै सो वर्ष ३१ करोड ६० लाख मानिस एसिया र प्रशान्त क्षेत्रमा, २१ करोड ३० लाख मानिस अमेरिका, ९ करोड ५० लाख मध्यपूर्व र ७ करोड ४० लाख मानिस अफ्रिका गएका छन्। अन्टार्कटिकाको भने तथ्यांक समावेश छैन।
फ्रान्सको पर्यटन बोर्डले हालै सार्वजनिक गरेको तथ्याङ्कअनुसार सन् २०२४ मा १० करोड पर्यटकका साथ फ्रान्स विश्वकै सबैभन्दा बढी भ्रमण गर्ने देश बनेको छ। स्पेन ९ करोड ८० लाख पर्यटकसहित दोस्रो स्थानमा उक्लेको छ।
फ्रान्समा पर्यटक बढ्नुमा ग्रीष्मकालीन ओलम्पिक, पेरिसको प्रतिष्ठित नोट्रे डेम क्याथेड्रलको पुनः उद्घाटन र नोर्मान्डीमा डी–डे अवतरणको ८०औं वर्षगाँठलाई तीन प्रमुख कार्यक्रमका रूपमा उल्लेख गरिएको छ।
नेपालमा भने सन २०२४मा ११ लाख ४७ हजार ५६७ पर्यटक भित्रिएका थिए। अघिल्लो वर्षको तुलनामा १३.१ प्रतिशत बढी पर्यटक नेपाल आएका हुन्। यद्यपि, यो संख्या कोभिड अगाडि (सन् २०१९)को जति भने होइन। २०१९ मा अहिलेसम्मकै धेरै ११ लाख ९७ हजार १९१ पर्यटक नेपाल आएका थिए।
-1740473541.jpeg)
