धरहरामा सुरु भयो टिकट व्यवस्था, स्वदेशी नागरिकलाई २०० रुपैयाँ शुल्क (फाेटाे/भिडियाे)

एभरेष्ट पेडिया टिभी

गृहपृष्ठ
एभरेष्ट पेडिया टिभी
धरहरामा सुरु भयो टिकट व्यवस्था, स्वदेशी नागरिकलाई २०० रुपैयाँ शुल्क (फाेटाे/भिडियाे)

धरहरामा सुरु भयो टिकट व्यवस्था, स्वदेशी नागरिकलाई २०० रुपैयाँ शुल्क (फाेटाे/भिडियाे)

आइतबार, मंसिर ९, २०८१ मनिष अर्याल

काठमाडौं। नेपालको ऐतिहासिक सम्पदा धरहराले आइतबारदेखि औपचारिक रूपमा टिकट प्रणाली सुरु गरेको छ। सुन्धारास्थित धरहरामा दिउँसो साढे १२ बजेदेखि टिकट बिक्री सुरु भएसँगै आगन्तुकहरूले उत्साहका साथ धरहरा भ्रमण गरेका छन्।

सरकारले हालै स्वीकृत गरेको नयाँ शुल्क दरअनुसार नेपाली नागरिकले २०० रुपैयाँमा धरहरा चढ्न पाउने छन्। त्यसैगरी, सार्क मुलुकका नागरिकका लागि ५०० रुपैयाँ र अन्य विदेशी पर्यटकका लागि १ हजार रुपैयाँ शुल्क तोकिएको छ। यसअघि परीक्षण अवधिमा निःशुल्क प्रवेशको व्यवस्था गरिएको थियो।

Dharahara-(14)-1732438234.jpg

मन्त्रालयले विशेष वर्गका लागि छुटको व्यवस्था पनि गरेको छ। नेपाली विद्यार्थी, ज्येष्ठ नागरिक, बालबालिका र अपाङ्गता भएका व्यक्तिहरूले आधा शुल्कमा धरहरा भ्रमण गर्न पाउने छन्। सवारी साधनको पार्किङका लागि चारपाङ्ग्रे सवारीमा प्रतिघण्टा २० र दुईपाङ्ग्रेमा १० रुपैयाँ शुल्क तोकिएको छ।

व्यावसायिक प्रयोजनका लागि धरहरा परिसरमा छुट्टै शुल्क दर निर्धारण गरिएको छ। राष्ट्रिय महत्वका विज्ञापन र व्यावसायिक भिडियो छायाङ्कनका लागि प्रतिघण्टा ५००० रुपैयाँ तथा फोटोग्राफीका लागि प्रतिघण्टा १००० रुपैयाँ लाग्ने व्यवस्था गरिएको छ। यो नयाँ शुल्क दर मंसिर ९ गतेदेखि कार्यान्वयनमा आएको सहरी विकास मन्त्रालयले जनाएको छ। विशिष्ट संरचना सञ्चालन तथा व्यवस्थापन विकास समितिको नयाँ आदेशअनुसार यी शुल्कहरू लागू गरिएका हुन्।

Dharahara-(13)-1732438233.jpg