गन्तव्य 'ढोरपाटन' (फाेटाेफिचर)

फोटो ग्यालरी

गृहपृष्ठ
फोटो ग्यालरी
गन्तव्य 'ढोरपाटन' (फाेटाेफिचर)

गन्तव्य 'ढोरपाटन' (फाेटाेफिचर)

शुक्रबार, कात्तिक १६, २०८१ मनिष अर्याल

1/1

ढोरपाटन। शिकार आरक्षको रुपमा चिनिएको ढोरपाटन अहिले आन्तरिक पर्यटकको आकर्षक गन्तव्य बन्दै गएको छ। विगतमा बाह्य शिकारीहरुको मात्र पहुँच रहेको यस क्षेत्रमा पछिल्लो समय प्रचारप्रसार बढ्नाले आन्तरिक पर्यटन फस्टाउन थालेको हो।

स्थानीय हिमालय वाइल्डलाइफ आउटफिटरका संचालक दिपक थापाका अनुसार ढोरपाटन शिकार आरक्षमात्र नभएर धार्मिक एवं प्राकृतिक पर्यटनको पनि उत्कृष्ट गन्तव्य हो। यहाँ रहेको उत्तरगंगा बराहक्षेत्र मन्दिरले धार्मिक पर्यटनको विकासमा महत्वपूर्ण भूमिका खेल्न सक्ने उनको भनाइ छ।

Dhorpatan-(1)-1730508172.jpg

गण्डकी प्रदेशको बाग्लुङ, म्याग्दी र लुम्बिनी प्रदेशको पूर्वी रुकुममा फैलिएको यस क्षेत्रमा वर्षायाममा विभिन्न रंगीचंगी फूल फुल्ने, हिउँदमा हिउँ खेल्न पाइने र वसन्त ऋतुमा लालीगुराँस र चिमल फुल्ने गर्दछ। वि.सं. २०४४ मा स्थापित यो नेपालको एकमात्र शिकार आरक्ष हो, जसको क्षेत्रफल १३२५ वर्ग किलोमिटर रहेको छ।

पर्यटन पूर्वाधारको विकास हुँदै गएको यस क्षेत्रमा साना होटल, सामुदायिक होटल र होमस्टेहरूको सुविधा उपलब्ध छ। एक पटकमा करिब ६०० जनासम्म पर्यटक बस्न सक्ने क्षमता भएका यी सुविधाहरूमा तिब्बती शरणार्थीहरूले सञ्चालन गरेका होटलहरूमा विशेष तिब्बती परिकार र भोटे चियाको स्वाद लिन सकिन्छ।

Dhorpatan-(2)-1730508250.jpg

यहाँबाट निसेलढोर, छ्यान्तुङ, गुर्जाघाट र जलजला लगायतका स्थानमा पदयात्रा गर्न सकिन्छ। आरक्षमा १६४ प्रजातिका चराचुरुंगी र नाउर, झारल, घोरल, रेड पाण्डा, हिउँ चितुवा लगायतका दुर्लभ वन्यजन्तु पाइन्छन्।

यद्यपि थापाका अनुसार यस क्षेत्रको विकासका लागि राज्यको पर्याप्त ध्यान पुग्न सकेको छैन। "राज्यका विभिन्न निकायहरूबाट ढोरपाटन छुटेको जस्तो लाग्छ, प्रचारप्रसारका लागि जुन तहबाट काम हुनुपर्ने हो, त्यो हुन सकेको छैन," उनले भने।

Dhorpatan-(4)-1730508262.jpg

बुर्तिबाङबाट कच्ची सडक मार्ग हुँदै करिब ३-४ घण्टाको यात्रापछि देउरालीसम्म पुग्न सकिन्छ, जहाँबाट ठूलो पाटनको दृश्यावलोकन गर्न सकिन्छ। पर्यटन विकासका लागि पूर्वाधार विकास र प्रचारप्रसारमा राज्यको ध्यान जान आवश्यक रहेको स्थानीयहरूको भनाइ छ।

तस्बिरहरु:

Dhorpatan-(21)-1730508625.jpg