काठमाडौं। हङकङमा बसेर साहित्यिक अभियान चलाउँदै आएका सङ्खुवासभाका राजकुमार राईको पहिलो उपन्यास ‘किवाहाङ’ सार्वजनिक भएको छ। सङ्खुवासभा–काठमाडौं जर्नालिस्ट एसोसियसनले बिहीबार काठमाडौंमा आयोजना गरेको कार्यक्रममा प्रा.डा. सुरेन्द्र के.सी., कथाकार माया ठकुरीलगायतले सामूहिक रुपमा पुस्तक लोकार्पण गरेका हुन्।
उपन्यासमा विश्वयुद्धकालीन परिवेशपछिका सन्दर्भमा गोर्खा सैनिकहरूको जीवन भोगाइका आयामहरू उतारिएको छ। उपन्यासकार राईले आफ्नी हजुरआमाबाट सानैदेखि सुन्दै आएका कथाव्यथालाई आधार बनाएर केही खोजमूलक तथ्य समेटेर उपन्यासको रुप दिएका हुन्।
उपन्यासमा विश्वयुद्धकालीन परिवेशपछिका सन्दर्भमा गोर्खा सैनिकहरूको जीवन भोगाइका आयामहरू उतारिएको छ। उपन्यासकार राईले आफ्नी हजुरआमाबाट सानैदेखि सुन्दै आएका कथाव्यथालाई आधार बनाएर केही खोजमूलक तथ्य समेटेर उपन्यासको रुप दिएका हुन्।
उपन्यासकार राजकुमार राई
कार्यक्रममा प्रमुख वक्ता डा. के.सी.ले इतिहासका अदृश्य पाटालाई उपन्यासकारले सन्तुलित रुपमा उधिन्ने कोसिस गरेको बताए। ‘रोजीरोटीका लागि हङकङमा बसेर पनि साहित्यसेवामा समर्पित भएकामा राईलाई बधाई दिन्छु’, डा. के.सी.ले भने, ‘किवाहाङको सफलताको कामना पनि गर्दछु।’
उपन्यासकार राई ‘साझा शृङ्खला’ नामक साहित्यिक अभियानका अभियन्ता हुन्। यस अन्तर्गत हरेक महिनाको एक पटक हङकङमा बसेका नेपाली मूलका लेखक, साहित्यकारको जमघट र रचना वाचन गरिन्छ।
त्यसैगरी उनले ‘साब्लाबुङ पुस्तकालय अभियान’ पनि चलाउँदै आएका छन्। यस मार्फत् नेपालका दुर्गम क्षेत्रका विद्यालयहरूमा पुस्तकालय स्थापना गर्न सहयोग गर्दै आएका छन्। यस अभियानमा पुस्तक प्रदान गर्नेहरूलाई बिहीबारै सम्मान पनि गरियो। उपन्यासकार राईले हङकङबाटै साब्लाबुङ नामक साहित्यिक पत्रिका पनि प्रकाशन गर्दै आएका छन्।